shaukat tarin
پاکستان تحریک انصاف نے مشیر خزانہ شوکت فیاض ترین کو خیبر پختونخوا سے سینیٹ کی خالی نشست کے لیے انتخابی ٹکٹ جاری کردیا۔تفصیلات کے مطابق پاکستان تحریک انصاف کے سیکریٹری جنرل عامر کیانی نے خیبرپختونخوا کی خالی سینیٹ کی نشست کے لیے باضابطہ طور پر پارٹی ٹکٹ جاری کردیا ہے۔سینیٹ کی یہ نشست پی ٹی آئی کے سینیٹر ایوب آفریدی کے استعفے کے بعد خالی ہوئی تھی، انہیں بعد ازاں وزیراعظم کا مشیر برائے اوورسیز مقرر کیا گیا تھا۔الیکشن کمیشن کی جانب سے سینیٹ کی خالی نشست پر انتخاب کا شیڈول بھی جاری کیا جاچکا ہے جس کے تحت خالی نشست پر انتخاب 20 دسمبر کو ہوگا۔ خیبر پختونخوا اسمبلی میں تحریک انصاف کی عددی اکثریت کے باعث شوکت ترین کی کامیابی کو یقینی سمجھا جارہا ہے۔واضح رہے کہ شوکت ترین پیپلز پارٹی کے دور میں بھی سینیٹر رہ چکے ہیں اور انہوں نے اس وقت بھی وزارت خزانہ کا قلمدان سنبھال رکھا تھا تاہم کچھ ہی عرصے بعد انہوں نے سینیٹ کی رکنیت سے استعفیٰ دے دیا تھا۔
